Psa 61 | KikGKY | STEP | Thaburi ya Daudi Wee Ngai, igua kĩrĩro gĩakwa; thikĩrĩria ihooya rĩakwa.

Psalms 61

Kũhooya Ũgitĩri wa Ngai

Thaburi ya Daudi

1 ^aWee Ngai, igua kĩrĩro gĩakwa;
thikĩrĩria ihooya rĩakwa.

2 Ndĩragũkaĩra kuuma ituri cia thĩ,
ndĩragũkaĩra o ngoro yakwa ĩgĩthiragwo nĩ hinya;
ndongoria nginye rwaro-inĩ rwa ihiga rũrĩa rũraihu na igũrũ kũngĩra.
3 ^bNĩgũkorwo nĩwe ũkoretwo ũrĩ rĩũrĩro rĩakwa,
mũthiringo mũraihu na igũrũ wa hinya wa kwĩhitha kuuma kũrĩ thũ.

4 ^cNdĩĩriragĩria gũtũũra hema-inĩ yaku nginya tene,
na ndĩĩhithage kĩĩruru-inĩ kĩa mathagu maku.
5 ^dNĩgũkorwo Wee Ngai nĩũiguĩte mĩĩhĩtwa yakwa,
nĩũngaĩire igai rĩa andũ arĩa metigĩrĩte rĩĩtwa rĩaku.

6 Ongerera matukũ ma mũthamaki ma gũtũũra muoyo,
mĩaka yake ĩigane ta ya njiarwa nyingĩ.
7 ^eAroikarĩra gĩtĩ kĩa ũnene arĩ mbere ya Ngai nginya tene;
tũma wendo na wĩhokeku waku imũgitagĩre.

8 ^fHĩndĩ ĩyo ngatũũra nyinaga rwĩmbo rwa kũgooca rĩĩtwa rĩaku,
na hingagie mĩĩhĩtwa yakwa mũthenya o mũthenya.